ఈ తాత్కాలికమైన జీవితంలో
మనిషి అనేవాడు
తనను తాను
నిరూపించుకునే ఆరాటంలో
ఇతరులను తక్కువ చేస్తూ ఉంటాడు
అహం అతని కవచమవుతుంది
ద్వేషం అతని ఆయుధమవుతుంది
కానీ అవే
తన ఆత్మను నెమ్మదిగా
చీల్చి వేస్తున్నాయని
అతనికి అర్థం కాదు!
ఎందుకు జన్మించాడో తెలియదు
ఎవరికి ఉపయోగపడాలో అనేది మరిచి
వ్యక్తిత్వాన్ని కోల్పోయేలా
నిత్యం దాన్ని దిగజార్చుకుంటూ
ఎవరి మీద గెలవాలో
ఆలోచిస్తూ ఉంటాడు!
చివరికి
ఈ శ్వాస కూడా అద్దెదే అని
ఈ దేహం కూడా ప్రయాణికుడే అని
అర్థమయ్యేసరికి
కాలం తన ఖాతా మూసేస్తుంది!
మనిషిగా పుట్టడం యాదృచ్ఛికం
కానీ మనిషిగా జీవించడం మాత్రం
మన చేతుల్లోనే ఉన్న భాధ్యత!
- Kallem Naveen Reddy
No comments:
Post a Comment